Oхин үрээ хайрла!

Охин үрээ хайрла Омогдож загнахдаа хайрла
Охин үрээ хайрла Ойворгон зэмлэхдээ ч хайрла
Нар ханын толгойд буухад хааяа нэг сэрэг бүү зэмлэ
Насаараа тэр чинь өглөө босох хүн, төрсөн гэртээ л нойр аваг
Нар шингэж үдшийн хар чийг унатал найз нартайгаа дуулалдаг
Насаараа тэр чинь айлын голомт манаж морин төвөргөөн хүлээнэ
Энхрий гарын нь хурууг чилтэл гэр зуураа зарахдаа
Ээжийн цай уулгаж, аавын үгээр энхрийл
Эцгийн гэрээс гармагц эрийн гарт нухлагдана
Харийн газар одож, хадмын нүүрийг царайчилна
Насаараа уухгүй амтат цайг нчлх багад нь уулга
Насаараа амсахгүй жаргалыг нялх багад нь тоонотод нь эдлүүл
Насаараа сонсохгүй энхрий үгийг нялх багад нь гамнахгүй хэл
Насаараа нууж урсгах гашуун нулимсыг нь бодож цөөн уйлуул, охин үрээ
Хүний гэргий болох гэж гангар шаазан шиг хагарна
Хүүхэн хонгор үрээ гарын алгандаа энхрийл
Хүй орчлонгийн тамтай тэхцүүлж түүнээ хайрла
Хөөрхөн хонгор аашинд нь эрхлүүлж түүнээ хайрла
Үрийн эх болох гэж алтан заадас сална
Үүлэн хонгор үрээ тэнгэрийн магдалдаа эрхлүүл
Үйл нь дуусдаггүй хорвоод балчирт нь амжиж жаргаа
Үс гэзгээ цайтал өнөд шаналахыг нь болгоо
Зөөлөн булбарай хурууг нь зүү утастай шадарлуул
Зүйдэл оёдлын хорвоод охин чинь төрснийг сана
Зөөлөн хонгор аашийг нь зүйр үгтэй шадарлуул
Зөвлөх хэлэлцэхийн хорвоод охин төрснийг
Арван жил зэмлээд ч ухааруулж амжаагүй үгийг чинь
Анхны үр нь төрөөд үдшийн шөнөд ухааруулна.
Хорин жил дуудаад ч сэрээгүй нойрыг нь
Хонгор үр нь төрөөд үүрийн жавраар хулжаана
Охин үрээ энхрийл, орчлонгийн зовлонд цадахын цагтаа
Огшуун нулимсандаа живэхийн цагтаа хожмоо нэг дурсана
Аавын гэрт жаргасандаа гэж хэзээд нэг тайтгарна
Ээжийн гэрт эрхэлсэндээ гэж эрхгүй нэг уужирна
Охин үрээ хайрла Хясаа сувдаа нуудаг шиг хайрла
Охин үрээ хайрла Уул усаа хураадаг шиг хайрла
Охин үрээ хайрла Уул эрдэнээ нуудаг шиг хайрла
Охин үрээ хайрла Ус загасаа цэнгүүлдэг шиг хайрла
Хатуугаас хатуу үгийг ханатлаа үр чинь сонсоно
Хавраас намар хүртэл төрхөмдөө очиж хэлэх үү?
Хайртай охиноо зэмлэхдээ харцаараа ч болов энхрийл
Ховрын шувууд шиг намрын жимс шиг үгийг охиндоо хэл
Бусдыг хайрлах гэж өгсөн юм, охин үрээ энхрийл
Буцаж урсдаг ус гэж байхгүй, эргэж та нарыг хайрлахгүй
Эргүүлэгт орсон харин охин үрийг чинь харйлахгүй
Энгэсэгт хацраар гэрэлтэвч зовлон нь та нарт харагдахгүй
Үндэс газарт, цэцэг нь тэнгэрт
Үүн лүгээ адил санаж охин үрээ хайрла
Тэнгэрт чинь нар ч бий, хур ч бий, аянга ч бий
Тэнгэрлэг охин үрийг чинь жаргал ч тосно, зовлон ч тосно
Хөөрхий түүнийг нялхад нь жаргаа
Хүүрнэн суугаад яах вэ дээ, орчлон түүний багш юм
Хүний гарт очиж бүсгүй түүнийг энхрийл охин үрээ хайрла!